الشروط والأحكام

لعبة جكارو · آخر تحديث ٢٢ أغسطس ٢٠٢٦

هالصفحة تشرح الاتفاق بينك وبيننا وانت تلعب جكارو. إذا نزّلت اللعبة ولعبت فيها، فانت موافق على اللي مكتوب هني. وإذا شي منه ما عجبك، لا تستخدم اللعبة وراسلنا وقل لنا شنو.

هذي لعبة

جكارو لعبة تسلية، وكل شي داخلها — الكوينز والكروت والحطب والطاولات — جزء من اللعب. ما فيها مراهنات، وما فيها ربح فلوس، وما تنسحب منها فلوس.

حسابك

• الحساب مربوط بجهازك. ما نطلب منك إيميل ولا رقم تلفون ولا كلمة سر.
• هذا يعني إن حسابك يمشي مع الجهاز نفسه — إذا بدّلت التلفون أو مسحت التطبيق، يمكن ما يرجع لك رصيدك. راسلنا قبل، ونشوف شنو نقدر نسوي لك.
• انت مسؤول عن اللي يصير من جهازك. أي أحد يمسك تلفونك يقدر يلعب بحسابك ويصرف رصيدك.
• حسابك لك انت، ما ينباع ولا ينحوّل ولا ينشارك.

الكوينز والكروت

• الكوينز والكروت أشياء افتراضية داخل اللعبة — رخصة استخدام لك، مو ملكية، وما لها أي قيمة نقدية.
• ما تنبدّل بفلوس، ولا تنحوّل لأحد ثاني، ولا تنسحب برّا اللعبة.
• ما تنرجع ولا يتم استرداد قيمتها، إلا بالقدر اللي تسمح فيه سياسة الاسترجاع حق آبل نفسها.
• تقدر تعرف كم رصيدك من داخل اللعبة، والرصيد اللي عندنا على السيرفر هو الرصيد الصحيح.
• نقدر نعدّل أسعار الأشياء داخل اللعبة، أو نغيّر تكلفة دخول الطاولة والجايزة، أو نوقف بيع شي — بس ما نسحب منك شي اشتريته وانت ملتزم بالشروط.

الشراء

• الشراء كله يمر عبر آبل. احنا ما نشوف ولا نخزّن أي بيانات دفع.
• فاتورتك من آبل، والاسترجاع كذلك من آبل عن طريق reportaproblem.apple.com. واحنا ما نقدر نرجّع لك فلوس بأنفسنا.
• اللي تشتريه يوصل لحسابك أول ما نتأكد من آبل إن العملية تمت. إذا مر يوم وما وصل، راسلنا وذكر لنا وقت العملية.
• إذا رجّعت لك آبل فلوس عملية، نقدر نسحب اللي انضاف لك من كوينز أو كروت مقابلها.

على الطاولة

الطاولة مجلس، وله أدب. اللي ممنوع:

• السب والشتم والكلام البذي، سواء بالمايك أو بالاسم اللي تختاره أو بالصورة.
• التنمّر على أحد، أو التحرّش، أو التعرّض لأحد بدينه أو عرقه أو عايلته.
• التهديد، أو نشر معلومات أحد ثاني.

المايك اختياري وانت اللي تشغّله. وإذا أزعجت اللي وياك على الطاولة، نقدر نقفل مايكك أو نوقف حسابك. وإذا شفت أحد يتجاوز، راسلنا على support@jackaroo.site.

الغش

السيرفر عندنا هو اللي يمسك اللوح والرصيد، والتلفون ما يقرر شي بنفسه. ممنوع تحاول تتلاعب باللعبة أو بالرصيد — تعديل التطبيق، أو استغلال خلل، أو استخدام برامج تلعب عنك، أو محاولة الوصول لحسابات غيرك. اللي يسوي شي من هذا نقدر نوقف حسابه أو نمسحه، ونسحب الكوينز والكروت اللي جته من هالطريق، بدون تعويض.

الخدمة كما هي

نشتغل عشان السيرفر يكون شغال وقت ما تبي تلعب، بس اللعبة تنقدّم لك كما هي وبدون أي ضمان. ممكن ينقطع الاتصال، أو نوقف الخدمة للصيانة، أو نغيّر أو نشيل ميزة. ما نتحمّل الخسائر غير المباشرة، ومسؤوليتنا — بأي حال — ما تتجاوز اللي دفعته لنا عن آخر ١٢ شهر.

العمر

اللعبة مو موجّهة للأطفال دون ١٣ سنة. إذا كان عمرك أقل من السن اللي يسمح فيه القانون عندك، لازم يكون ولي أمرك موافق.

إيقاف الحساب

تقدر توقف اللعب وتمسح حسابك وقت ما تبي — شوف صفحة حذف الحساب. واحنا نقدر نوقف حسابك إذا خالفت هالشروط. بأي حالة، الكوينز والكروت تروح ولا يتم تعويضها.

خصوصيتك

شنو نجمع وشنو ما نجمع، كله مكتوب بـ سياسة الخصوصية، وهي جزء من هالشروط.

تغييرات

إذا تغيّر شي بهالصفحة، بنحدّث التاريخ اللي فوق. واستمرارك باللعب بعد التغيير معناه إنك موافق عليه.

القانون

هالشروط تخضع لقوانين دولة الكويت، وأي خلاف يكون من اختصاص محاكم دولة الكويت.